सिड्नी । अष्ट्रेलियाका प्रधानमन्त्री एन्थोनी एल्बानीजले इजरायलका राष्ट्रपति इसाक हर्जोगलाई अष्ट्रेलिया भ्रमणका लागि औपचारिक निम्तो दिने बताएका छन् । सिड्नीमा यहूदी समुदायलाई लक्षित गरी भएको दुःखद घटनापछि यो निर्णय गरिएको जनाइएको छ ।
प्रधानमन्त्री एल्बानीजले सामाजिक सञ्जालमार्फत सार्वजनिक गरेको वक्तव्यमा अष्ट्रेलियाली सरकारको सिफारिसअनुसार गभर्नर–जनरलले स्थापित कूटनीतिक प्रक्रिया पालना गर्दै राष्ट्रपति हर्जोगलाई यथाशीघ्र अष्ट्रेलिया भ्रमणको निम्तो प्रदान गर्ने उल्लेख गरेका छन् ।
सिड्नीको बन्डाइ समुद्री किनारमा हानुका पर्वका अवसरमा आयोजित कार्यक्रममा भएको आक्रमणका कारण १५ जनाको ज्यान गएको थियो । सम्बन्धित निकायका अनुसार उक्त घटना यहूदी समुदायविरुद्ध लक्षित घृणाजन्य आतङ्कवादी कार्यका रूपमा लिइएको छ ।
उक्त घटनापछि राष्ट्रपति हर्जोगले अष्ट्रेलियामा देखिँदै आएको यहूदीविरोधी घृणाविरुद्ध प्रभावकारी कदम चाल्न आग्रह गरेका थिए ।
इजरायली राष्ट्रपतिको कार्यालयले प्रधानमन्त्री एल्बानीजसँग भएको टेलिफोन संवादको पुष्टि गर्दै अष्ट्रेलियाली सरकार तथा यहूदी समुदायबाट राष्ट्रपति हर्जोगलाई भ्रमणको निमन्त्रणा प्राप्त भएको जनाएको छ ।
राष्ट्रपति हर्जोगको भ्रमणको मिति भने हालसम्म निर्धारण गरिएको छैन ।
प्रतिक्रिया