संयुक्त राष्ट्रसङ्घ । सुुडानको दार्फुर, कोर्दोफान, उत्तर राज्य र नाईल नदी क्षेत्रमा विस्थापितको सङ्ख्या तीव्र बढेको संयुक्त राष्ट्रसङ्घीय मानवीय संयोजन कार्यालय (ओचा) ले जनाएको छ ।
ओचाका अनुसार अल–फासिर क्षेत्रमा बढ्दो असुरक्षा र सशस्त्र लुटपाटका घटनाले सर्वसाधारणको दैनिकी जोखिमपूर्ण बन्दै गएको छ । अक्टोबरको अन्त्यमा तीव्र प्रतिक्रिया बलले शहर नियन्त्रणमा लिएपछि सहायता संस्था अझै पनि भित्र प्रवेश गर्न सकेका छैनन् ।
अन्तर्राष्ट्रिय आवागमन सङ्गठन (आइओएम) ले एक हप्ता यता मात्र अल–फासिर र वरपरका गाउँहरूबाट एक लाख छ हजारभन्दा बढी व्यक्ति विस्थापित भएको बताएको छ । तीमध्ये करिब अस्सी प्रतिशत मानिस शहरको पश्चिम र उत्तरका ग्रामीण क्षेत्रमा अड्किएका छन् ।
दक्षिण कोर्दोफानको कोर्ताला गाउँबाट शुक्रबार मात्र एक हजार छ सयभन्दा बढी नागरिक लडाइँका कारण भाग्न बाध्य भएको आइओएमले जनाएको छ ।
उत्तर दार्फुर र कोर्दोफानबाट भइरहेको लगातार विस्थापनले उत्तर राज्य र नाईल नदी क्षेत्रमा पनि खाद्य, पानी, स्वास्थ्य, आश्रय र सरसफाइ सेवाको आवश्यकता झन् बढेको ओचाले उल्लेख गरेको छ ।
उत्तर राज्यका स्थानीय अधिकारीका अनुसार पछिल्ला केही हप्ता यता सात हजारभन्दा बढी विस्थापित त्यहाँका ग्रामीण क्षेत्र अद–दाबाहमा बसिरहेका छन्, र दैनिक तीन सयभन्दा बढी नयाँ आगमन भइरहेको छ ।
संयुक्त राष्ट्रसङ्घ तथा साझेदार संस्थाहरूले प्राथमिक उपचार, खाद्य सहायता, सुरक्षित खानेपानी र मनोसामाजिक सहयोग उपलब्ध गराइरहेका छन् । तर आवश्यक रकम अभावका कारण विशेष गरी शौचालय तथा सफाइ व्यवस्थामा ठूलो कमी रहेको ओचाले जनाएको छ ।
ओचाले सबै पक्षलाई नागरिक तथा सहायता कर्मीको सुरक्षा सुनिश्चित गर्दै अवरोधविहीन मानवीय पहुँच दिन आग्रह गरेको छ ।
प्रतिक्रिया