कतारका प्रमुख वार्ताकारद्वारा गाजा वार्ताको गतिप्रति ‘निराशा’ व्यक्त

दोहा । इजरायलले प्यालेस्टिनी क्षेत्रमा आफ्नो आक्रमण पुनः सुरु गरेको एक महिनापछि र अर्को चरणको वार्ता सम्झौताबिना नै समाप्त भएपछि कतारका प्रमुख वार्ताकारले एएफपीसँगको अन्तर्वार्तामा गाजामा युद्धविरामको वार्ताप्रति निराशा व्यक्त गरेका छन् ।

“हामी निश्चित रूपमा वार्ता प्रक्रियाको कहिलेकाहीँ हुने सुस्तताप्रति निराश छौँ । यो एक जरुरी विषय हो । यदि यो सैन्य अभियान दिनहुँ जारी रह्यो भने यहाँ जीवनहरू खतरामा पर्छन्”, मोहम्मद अल–खुलैफीले भने ।

कतारले संयुक्त राज्य अमेरिका र इजिप्टसँग मिलेर इजरायल र हमासबीच गाजामा युद्धविराम मध्यस्थता गरेको थियो । युद्धविराम जनवरी १९ मा लागू भएको थियो र प्यालेस्टिनी लडाकूहरूको सन् २०२३ अक्टोबर ७ को इजरायलमाथिको आक्रमणले शुरू गरेको एक वर्षभन्दा बढीको युद्धलाई मोटामोटी रूपमा रोकेको थियो ।

युद्धविरामको प्रारम्भिक चरण मार्चको शुरुमा समाप्त भयो । दुई पक्ष अर्को चरणहरूमा सहमत हुन सकेनन् ।

हमासले जनवरीको ढाँचामा उल्लिखित युद्धको स्थायी अन्त्यका लागि दोस्रो चरणको युद्धविरामका लागि वार्ता गर्न जोड दिएको छ ।

प्रारम्भिक चरणमा विस्तारको आह्वान गरेको इजरायलले पहिले नै सहायता प्रवेशलाई रोकेपछि मार्च १८ मा गाजा पट्टीमा हवाई र भूमि आक्रमणहरू पुनः सुरु गर्यो ।

बिहीबार राति हमासले इजरायलको ४५–दिनको युद्धविरामका लागि नयाँ प्रस्ताव स्वीकार नगर्ने सङ्केत दिएको थियो । प्यालेस्टिनी समूहले बन्धक बनाएको १० जना जीवित बन्धकलाई रिहा गर्न इजरायलले चाहेको लडाकू समूहले जनाएको छ ।