आफूले ल्याएका कार्यक्रम बजेटमा समेट्न माग गर्दै कोशीका पूर्वमुख्यमन्त्री कार्की आमरण अनसनमा

विराटनगर । कोशीका पूर्वमुख्यमन्त्री केदार कार्कीले आमरण अनसन सुरु गरेका छन् । आफू मुख्यमन्त्री हुँदा ल्याएका ‘समाजवादी’ कार्यक्रमलाई बजेटमा समेट्नुपर्ने माग राख्दै कार्कीले मंगलबार अनसन सुरु गरेका हुन् ।

सरकारले प्रदेशसभामा पेस गरेको बजेट गत ८ असारमा पारित भएको थियो । बजेट पास भएको करिब तीन महिना बित्न लाग्दा बजेटमा आफूले ल्याएका कार्यक्रमलाई निरन्तरता नदिइएको भन्दै पूर्वमुख्यमन्त्री कार्कीले आमरण अनसन सुरु गरेका हुन् ।

कार्कीले आफ्नो माग सरकारले पूरा नगरे भन्दै प्रदेशसभाबाटै अनसन घोषणा गरेका थिए । पूर्वमुख्यमन्त्री कार्कीले मुख्य रूपमा आफू मुख्यमन्त्री भएको बेला घोषणा गरेको १० वर्षमुनिका बालबालिकाका लागि विशिष्टीकृत सेवासहित निःशुल्क उपचार कार्यक्रमलाई निरन्तरता दिनुपर्ने मागलाई प्रमुखताका साथ उठाएका छन् ।

यता, बहालवाला मुख्यमन्त्रीको सचिवालयले भने बालबालिकाको उपचारका नाममा निजी अस्पतालमा अन्धाधुन्ध रकम वितरणको विषयलाई मात्र रोकेको जनाएको छ ।

जिल्ला प्रशासन कार्यालय मोरङले कार्कीको अनसन रोक्नकै लागि प्रदेशसभा र आसपासका क्षेत्रमा मंगलबार निषेधाज्ञा जारी गरेको थियो। प्रशासनले निषेधाज्ञा लगाएकै क्षेत्रमा उनले अनसन थालेका हुन्।

प्रशासनले कोशी प्रदेशसभा सचिवालयको कार्यालय क्षेत्र रहेको देवकोटा चोकदेखि अस्पताल चोकसम्म, मुख्यमन्त्री कार्यालय रहेको रोडशेष चोकदेखि जतुवा चोकसम्म, कोशी प्रोजेक्टस्थित मुख्यमन्त्री निवास वरपर, प्रदेश प्रमुखको कार्यालय र निवास वरपरको ३०० मिटर क्षेत्र र जिल्ला प्रशासन कार्यालय मोरङ क्षेत्रलाई निषेधित क्षेत्र तोकिएको छ।