काठमाडौं । नेपाली कांग्रेसका सांसद शंकर भण्डारीले सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुब्बा गुरुङलाई तत्काल पदबाट बर्खास्त गर्न माग गरेका छन् ।
विज्ञप्ति जारी गरी सासद भण्डारीले देशको शान्ति सुरक्षा कायम गर्ने जिम्मा लिएको प्रहरी संगठनको प्रमुखलाई सञ्चारमन्त्रीले सार्वजनिक रुपमा अपशब्द व्यक्त गरेको भन्दै बर्खास्त गर्न माग गरेका हुन् ।
विज्ञप्तिमा भनिएको छ, ‘पछिल्लो समय नेपालमा घटिरहेको घटनाक्रम र सरकारका गतिविधिबाट मलाई एउटा राजनीतिककर्मी भएका नाताले अत्यन्त छटपटी लागेको हुँदा मैले यो वक्तव्य निकाल्न पर्ने स्थिति आएको छ। देशको शान्ति सुरक्षा कायम गर्ने जिम्मा लिएको प्रहरी संगठनको प्रमुखलाई नेपाल सरकारका प्रवक्ता तथा सुचना तथा संचार मन्त्रीबाट सार्वजनिक स्थलमा अपशब्द व्यक्त भएकोमा मैले त्यसको घोर भर्त्सना गर्दै प्रधानमन्त्रीले संचार मन्त्रीलाई बर्खास्त गर्न आव्हन गर्दछु।’
मन्त्री गुरुङले केहीदिन अघि पोखरामा आयोजित एक कार्यक्रममा प्रहरी महानिरीक्षकको जिब्रो थुत्नुपर्ने अभिव्यक्ति दिएका थिए ।
भण्डारीले विज्ञप्तिमा भनेका छन्, ‘शान्ति सुरक्षामा भविष्यमा कुनै तलमाथि हुन आएमा यसको जिम्मेवार स्वयं सरकार र प्रधानमन्त्री हुने कुरा व्यक्त गर्न चाहन्छु ।सरकारमा भएका वा जिम्मेवार व्यक्तिले सत्य तथ्य बङ्गाएर समाजमा वितृष्णा फैलाउने र पार्टी –पार्टी बीच सम्बन्ध नबिगार्न सबैलाई अनुरोध गर्दछु।’ यस विषयमा मन्त्री गुरुङलाई प्रधानमन्त्रीले ओलीलेसमेत सचेत गराएका छन् ।
प्रतिक्रिया