यो बजेटमा गठबन्धनको मुख्य दल एमालेका ‘जर्साब’, ‘कर्साब’हरूले के भन्नुभयो भन्ने मेरो धेरै टिप्पणी छैनः महामन्त्री थापा

काठमाडौं । नेपाली कांग्रेसका महामन्त्री गगन थापाले बजेटले नयाँ चरणको आर्थिक सुधारको मार्ग चित्रण नगरेको बताएका छन् ।

बुधबारको प्रतिनिधिसभा बैठकमा बजेटमाथिको छलफलका क्रममा महामन्त्री थापाले बजेटमा प्रधानमन्त्रीले नै चासो नराखेकाले कुनै आशावादी हुने ठाउँ नरहेको बताएका हुन् । उनले सरकारले बजेटमा लिएको ६ प्रतिशतको आर्थिक वृद्धिको लक्ष्यको आधार नभएको बताए ।

उनले अर्थमन्त्री वर्षमान पुनले ६ प्रतिशत आर्थिक वृद्धिदर हुन्छ भनेर गरेको दाबीको आधार माग गरे । उनले भने, ‘जुन खालको एउटा सृजनशीलता चाहिने हो, त्यो अर्थमन्त्रीमा मात्र हैन प्रधानमन्त्रीमा पनि देखिएन । बजेट निर्माण गर्दैगर्दा प्रधानमन्त्रीले कुनै चासो राखेको पाइनँ । कुनै कुरामा संलग्न भएको पाइनँ । नेपालका प्रधानमन्त्रीले जबसम्म यतिधेरै उदाशिनता राख्छन्, त्यो बेलासम्म बजेट काम लाग्ने डकुमेन्ट हुँदैन ।’

उनले बजेटबारे बोल्ने विषयमा आफू अलमलिएको बताए । महामन्त्री थापाले सरकारमा सहभागी सबैभन्दा ठूलो दलको नेताले नै बजेट माओवादी पार्टी र अर्थमन्त्रीको बताएपछि स्वामित्व कसले लिने भनेर प्रश्न गरे ।

उनले भने, ‘यो बजेटमा गठबन्धनको मुख्य दल एमालेका जर्साब, कर्साबहरूले के भन्नुभयो भन्ने मेरो धेरै टिप्पणी छैन । तर, प्रधानसेनापतिले नै यो बजेट हाम्रो होइन, रंग मिल्दैन भनेपछि यसको स्वामित्व कसले लिन्छ ?’

महामन्त्री थापाले संसदमा धेरै उथलपुथल भएको भन्दै ६/८ महिनापछि आफैँले काँध हाल्नुपर्ने हुनसक्ने टिप्पणी गर्दै बजेटबारे अर्थमन्त्रीलाई प्रश्न मात्रै गर्दा जोगिने अवस्था नरहेको बताए ।

उनले बजेटमा राजस्वको अनुमान १४ खर्ब १९ अर्ब राखिएको र लिएको लक्ष्य सबैभन्दा उच्चवृद्धि हुनुपर्ने बताए । करिब ३४ प्रतिशत वृद्धि भएमात्रै सरकारले लिएको लक्ष्य भेटिने जिकिर गरे ।

उनले एउटै पार्टीको अर्थमन्त्री र अर्थ सचिव उही हुँदा करका विषयमा वर्षैपिच्छे फरक आउँदा आशंका गर्ने ठाउँ प्रशस्त रहेको पनि बताए ।

उनले भने, ‘चाहे आलु प्याजको विषय होस्, चाहे ईभीको कुरा होस्, चाहे स्पन्ज आइरनको विषय होस्, त्यो अर्थ मन्त्रालयका केही मान्छे कुनामा बसेर करका दर चलाउने विषय होइन । कुनमा कर छुट दिने कुनमा लगाउने भन्ने विषय दुई चारजना मान्छे बसेर गर्ने कुरा होइन, यसमा प्रश्नहरू छन्, आशंकाहरू छन् । अहिलेका अर्थमन्त्रीकै पार्टीका अर्का नेता अर्थमन्त्री भएका बेलामा र अहिलेकै अर्थसचिव सचिव भएका बेला स्पन्ज आइरनमा भन्सार सहुलियत दिइएको थियो । त्यसबेला यही संसदमा ठूलो छलफल भएको थियो । त्यसबेला निजी क्षेत्रले ३४/३५ अर्ब लगानी गर्छ त्यही भएर यो दर कायम गरेको भनियो । त्यसपछि निजी क्षेत्रले लगानी पनि गर्यो ।आज अर्थमन्त्री त्यही पार्टीको हुनुहुन्छ, सचिव त्यही हुनुहुन्छ, नीति चाहिँ बदलियो । नीतिगत स्थायित्व भन्ने केही हुँदैन ? भोलि अर्को अर्थमन्त्री आउनुहुन्छ, उहाँलाई सनक चढ्यो, फेरि पहिलेजस्तै बनाइदिन्छु भन्न पाउने कि नपाउने ?’

उनले चिनियाँ गाडीको विषयमा बजेटमा राखिएकोबारेमा स्पष्ट पार्न आग्रह गरे । उनले भने, ‘चिनियाँ गाडीको बारेमा विधेयकमा किन घुसाउनु भएको हो, जान्न चहान्छु ।’

उनले अहिले नेपालको अर्थतन्त्रलाई कडा रोग लागेको भन्दै यसको उपचार सबै मिलेर खोज्नुपर्ने बताए । उनले भने, ‘अर्थतन्त्रमा कडा रोग लागेको छ । यो रोग रातारात लागेको हैन । यसमा हामी सबै जिम्मेवार छौँ । म कसैलाई दोष चिन चहान्नँ । यो संरचना नबदलिकन हुँदैन ।’