नेपाली जनता हेर्न चाहन्छन्, को रहेछ त्यो देशको गोप्य सूचना बेच्ने, सभामुखबाट रुलिङ होस्ः सांसद केसी

काठमाडौं । नेपाली कांग्रेसले देशको गोप्य सूचना विदेशमा बिक्री गर्ने सांसदको नाम खुलाउन रुलिङका लागि सभामुखको ध्यानाकर्षण गराएको छ ।

मंगलबारको प्रतिनिधिसभा बैठकमा नेपाली कांग्रेसका सांसद राजन केसीले नेपालको गोप्य सूचना बेच्नेकाबारेमा गृहमन्त्री रवि लामिछानेलाई प्रष्ट पार्नका लागि रुलिङ गर्न सभामुख देवराज घिमिरेको ध्यानाकर्षण गराएका हुन् ।

उनले भने, ‘देशको गोप्य सूचना विदेशमा बेच्ने सांसद यही संसदमा छ भनेर केही दिनअघि गृहमन्त्री रवि लामिछानेले भन्नुभयो । त्यो पनि सभामुखज्यूलाई साक्षी राखेर । यो अत्यन्तै गम्भीर कुरा हो, यो केवल आन्तरिक मामिलासँग मात्र सम्बन्धित छैन,यही संसदमा गोप्य सूचना बेच्ने मान्छे सांसद छ भनेर मुलुकको गृहमन्त्रीले भन्ने कुरा अत्यन्तै गम्भीर कुरा हो । नेपाली जनता हेर्न चाहन्छन्, को रहेछ त्यो देशको गोप्य सूचना बेच्ने । सभामुखबाट रुलिङ होस् ।’

केही दिनअघि गृहमन्त्रीले सदनमा सहकारी ठगीका विषयमा जवाफ दिने क्रममा संसदमा विदेशीलाई सूचना बेच्नेहरु यही सदनमा रहेका बताएका थिए ।