गृहमन्त्रीलाई गगन थापाको सुझावः म प्रसूतिगृहमा जन्मिएको हो, त्यहाँबाट अनुसन्धान सुरु गरे पनि हुन्छ

काठमाडौं । नेपाली कांग्रेसका महामन्त्री गगन थापाले गृहमन्त्री रवि लामिछानेलाई फाइल खोलौँ भनेर धम्क्याउन भन्दा फाइल खोलेर देखाउन चुनौती दिएका छन् ।

गृहमन्त्री रवि लामिछानेले संसदमा सम्बोधन गरेपछि आइतबार साँझ संसद भवनमा पत्रकार सम्मेलन गरी महामन्त्री थापाले फाइल खोलौँ, खोलौँ भनेर नधम्काई फाइल खोल्न चुनौती दिएका हुन् ।

उनले भने, ‘फाइल खोलौँ, खोलौँ भनेर धम्काउने होइन के, छानबिन गरौँ, गरौँ भन्ने होइन। म महामन्त्री यहीँ छु, उपसभापति धनराज गुरुङ यहीँ हुनुहुन्छ। सबै छानबिन गर्नुस्, नधम्क्याउनुस्, नतर्साउनुस्। गृह मन्त्रालय भनेको ठूलो जिम्मेवारी हो, धमाधम फाइल खोल्ने हो । धमाधम अनुसन्धान गर्ने हो, गलत भए कारबाही पो गर्ने हो त ।’

उनले गृहमन्त्री रवि लामिछानेले संसदमा बोलेर जनताको मन बहकाएको टिप्पणी गरे । महामन्त्री थापाले लामिछाने गृहमन्त्री हो कि टेलिभिजन प्रस्तोता हो भनेर छुट्याउन नसकेको बताए ।

उनले आफूमाथि रोस्ट्रमबाट गृहमन्त्री लामिछानेले लगाएको आरोप पुष्टि गर्न र समिति बनाउन आग्रह गरे । उनले भने,’मेरो अनुरोध छ, समिति बनाए पनि हुन्छ । यत्रो महत्त्वपूर्ण जिम्मेवारीमा हुनुहुन्छ, दायाँ प्रचण्ड, बायाँ ओलीजी हुनुहुन्छ । म प्रसूतिगृहमा जन्मिएको, त्यहाँबाट सुरु गरे हुन्छ, मज्जाले । नेपालतिर नभएको बेलाको घटना बताउँछु, त्यो पनि छानबिन गरे हुन्छ ।’

महामन्त्री थापाले कांग्रेसले लामिछानेलाई प्रधानमन्त्री बनाउन कुनै अफर नगरेको बताए। तर उनले रास्वपाका नेताले डेमोक्रेटिक अलाइन्स बनाउन तयार रहेको सन्देश लिएर आइरहेको उल्लेख गरे ।

उनले भने,‘हिजो उहाँका पार्टीका एकजना नेता कांग्रेसका नेताहरुसँग संसदीय समितिको टिओआरमा लचक भइदिनुपर्यो भनेर भन्न आउनु भएको थियो । उहाँले हामीलाई भित्तामा नपुर्याउन आग्रह गर्नुभयो ।’ उनले सहकारीबाट ऋण लिएर गोर्खा मिडियामा शेयर किनेको कागजातबाट पुष्टि हुने दाबी गरे।