काठमाडौं । प्रमुख प्रतिपक्षी दल नेपाली कांग्रेसले सहकारी ठगीमा संसदीय छानबिन समिति गठनको माग गर्दै बिहीबार पनि प्रतिनिधिसभा बैठकमा नाराबाजी गरेको छ । कांग्रेसको अवरोधकाबीच सभामुख देवराज घिमिरेले गृहमन्त्री रवि लामिछानेलाई बोल्न समय दिएपछि संसदमा धकेलाधकेल समेत भएको थियो ।
त्यसक्रममा एमाले अध्यक्ष केपी शर्मा ओली र कांग्रेस उपसभापति धनराज गुरुङबीच घोचपेचसमेत चलेको थियो । एमाले र कांग्रेसका सांसदहरू आक्रोशित बनेका थिए । अवस्था तनावपूर्ण बन्ने देखेपछि सभामुखले बैठक स्थगित गरेका हुन् । गृहमन्त्री रवि लामिछाने सहकारी ठगीमा जोडिएको भन्दै कांग्रेसले निरन्तर संसद अवरोध गर्दै आएको छ ।
बिहीबार बिहान ११ बजेका लागि बोलाइएको बैठक कांग्रेससँग सहमति गर्नेगरी अपरान्ह ४ बजेका लागि बोलाइएको थियो । यो बीचमा समय समयमा सत्तापक्ष र प्रतिपक्षले छलफल गरे पनि टुंगोमा नपुगेको हो । कांग्रेसको नाराबाजीपछि सभामुखले शुक्रबारसम्मका लागि बैठक स्थगित गरेका छन् ।
प्रतिक्रिया