सन् २०२३ आप्रवासीहरूका लागि सबैभन्दा घातक वर्ष भएको आइओएमको भनाई

सन् २०२३ मा विश्वभरमा आप्रवासन मार्गमा कम्तीमा आठ हजार पाँच सय ६५ जनाको मृत्यु भएको अन्तर्राष्ट्रिय आप्रवासन सङ्गठन (आइओएम) ले बताएको छ ।
एक दशकअघि सुरु गरिएका रेकर्डपछिको यस वर्ष सबैभन्दा घातक वर्ष बनेको छ ।

सन् २०२३ मा मृत्यु हुनेको सङ्ख्या सन् २०२२ को तुलनामा २० प्रतिशतले बढेको छ । यसले जीवनको थप क्षतिलाई रोक्नका लागि तत्काल कदम चाल्नुपर्ने देखाएको छ । गत वर्षको कूल सङ्ख्याले सन् २०१६ को पछिल्लो रेकर्डलाई तोडेको छ ।

सन् २०१६ मा आप्रवासनका क्रममा आठ हजार ८४ जनाको मृत्यु भएको थियो । आइओएमका अनुसार सुरक्षित तथा नियमित बसाइँसराइ मार्ग सीमित भएकाले प्रत्येक वर्ष हजारौँ मानिस असुरक्षित परिस्थितिमा अनियमति मार्गबाट बसाइँसराइको प्रयास गर्छन् ।

भूमध्य सागर पार गर्न आप्रवासीहरूका लागि सबैभन्दा घातक मार्ग भएको छ । यसमा गत वर्ष कम्तीमा तीन हजार एक सय २९ जनाको मृत्यु र बेपत्ता रेकर्ड गरिएको छ । सन् २०२३ मा कूल आप्रवासीको मृत्युमा आधाभन्दा धेरै मृत्यु डुबेर भएको छ ।