अर्थमन्त्रीको आक्रोशः साथीहरुलाई शंका लाग्छ भने भन्नुस्, त्यसको आधार हुनु पर्दैन ?

काठमाडौं । अर्थमन्त्री तथा कांग्रेस प्रवक्ता डा. प्रकाशशरण महतले सुन तस्करी प्रकरणमा आफूलाई दोषी प्रमाणित गर्न चुनौती दिएका छन् ।

आइतबार पार्टीको संसदीय दलको बैठकमा मन्त्री महतले आफ्नै पार्टीका सांसदले लाञ्छित गरेको भन्दै दोषी प्रमाणित गर्न चुनौती दिएका हुन् ।

उनले आफू दोषी भए एक मिनेट पनि पदमा नबस्ने बताए । उनले भने, ‘साथीहरुलाई शंका लाग्छ भने भन्नुस् । बाहिर बोल्दै हिँड्नु ठीक हो ? पार्टीमा अनुशासन छैन ? त्यसको आधार हुनु पर्दैन ?’ महतले आफूले गल्ती गर्न चाहेको भए देश र पार्टी नै नरहने बताए । उनले भने, ‘लोभ गर्ने भए कर निर्धारणमा म अनेक गर्न सक्थेँ । त्यसो गरेको भए न देश रहन्थ्यो, न पार्टी रहन्छ ।’

उनले आफूविरुद्ध केही व्यक्ति प्रायोजित भएर लागिपरेको बताए । पार्टीका सांसद सुनिल शर्माले सुन तस्करीमा अर्थमन्त्रीको संलग्नता रहेको भन्दै आरोप लगाउँदै हिँडेका छन् ।