नेताहरुले पूर्वराष्ट्रपति भण्डारीलाई भेटेको कुरालाई लिए पार्टीभित्र समस्या ल्याउन सकिन्छ कि भनेर फेरि कोसिस भयोः केपी ओली

काठमाडौं । नेकपा एमालेका अध्यक्ष केपी शर्मा ओलीले पार्टीभित्र समस्या ल्याउन सकिन्छ कि भनेर फेरि कोसिस भइरहेको बताएका छन् ।

आइतबार पार्टी केन्द्रीय कार्यालयमा आयोजित पत्रकार सम्मेलनमा अध्यक्ष ओलीले नेताहरूले पूर्वराष्ट्रपति विद्यादेवी भण्डारीलाई भेट्दैमा अन्यथा लिन नहुने बताए । उनले पूर्वराष्ट्रपति विद्यादेवी भण्डारी पार्टीका सबै नेताहरुको आदरणीय व्यक्तित्व भएको बताए ।

उनले भने, ‘पूर्वराष्ट्रपति विद्या भण्डारीजी हाम्रो पार्टीका सबै नेताहरुको राष्ट्रपति भएर एउटा आदरणीय व्यक्तित्व पनि हुनुहुन्छ । त्योभन्दा अघि हाम्रो नजिकको मित्र हो नि । हाम्रो पार्टीको उपाध्यक्ष नै हो नि । हाम्रो पार्टीको आदरणीय व्यक्ति नै हो नि । हामीमध्ये कसैले भेट्नु, कुरा गर्नु भनेको ठूलो कुरै होइन । विष्णु पौडेलजीले मात्रै होइन मैले पनि कुरा गरेको छु । अरुले पनि कुरा गर्नुभएको छ ।’

पार्टीका नेताहरुले पूर्वराष्ट्रपति भण्डारीलाई भेट्नु नौलो कुरा नभएको भन्दै भेटेका कुरालाई मलजल नगर्न आग्रह गरे ।

उनले भने, ‘कसैले कुरा गरेको विषयलाई कार्ड नै छपाएर लैजानुभयो होला त । पार्टीमा आइदिनुपर्यो भनेर निम्ता गर्न । यो खालका प्रयासहरुलाई साथीहरुले मलजल कहिलेकाहीँ नबुझी गरिन्छ । त्यो नगर्दा राम्रो हुन्छ ।’