शिक्षक महासंघले शिक्षक आन्दोलनबाट पढाइमा भएको क्षति हिउँदे वा वर्षे बिदाबाट आपूरण गर्ने
काठमाडौँ । एक महिना चलेको शिक्षक आन्दोलनबाट पढाइमा भएको क्षति हिउँदे वा वर्षे बिदाबाट आपूरण गरिने भएको छ ।
नेपाल शिक्षक महासङ्घले आन्दोलनबाट विद्यार्थीको सिकाइमा भएको क्षति हिउँदे वा वर्षे बिदाबाट आपूरण गर्न शिक्षकहरूलाई आग्रह गरेको हो ।
महासंघले विज्ञप्ति जारी गरी भनेको छ, ‘विद्यार्थी वर्गमा पर्न गएको शिक्षण सिकाइको क्षतिलाई ध्यानमा राखी आफ्नो अनुकूलता अनुसार हिउँदे वा वर्षे बिदामा सो क्षतिको आपूरण गर्नुहुन सबै प्रधानाध्यापक तथा शिक्षक –कर्मचारी साथीहरूमा अनुरोध छ ।’
आन्दोलनको बलमा विगतमा सहमति भई कार्यान्वयनमा नआएका विषयहरू मन्त्रिपरिषद्बाट निर्णयमार्फत कार्यान्वयन गराएको र २०८२ असार १५ गते भित्र विद्यालय शिक्षा विधेयक प्रतिनिधि सभाबाट पारित गर्ने सुनिश्चित भएकोले आफूहरूको आन्दोलन अत्यन्त सफल र उपलब्धिमूलक भएको महासङ्घको ठहर छ ।
