‘मेरिटोक्रेसीका आधारमा पनि गभर्नर नियुक्ति गर्न सकिन्छ, तर सरकार हावादारी काममा लाग्यो’
काठमाडौं । सरकारले एक महिनासम्म पनि नेपाल राष्ट्र बैंकको गभर्नर नियुक्त गर्न नसकेको भन्दै सांसदहरुले आलोचना गरेका छन् ।
बुधबारको प्रतिनिधिसभा बैठकमा सांसदहरुले सरकारले गभर्नर नियुक्तिमा समय खेर फालेको भन्दै सरकारको आलोचना गरेका हुन् । राष्ट्रिय स्वतन्त्र पार्टीकी सांसद चन्दा कार्कीले सरकारले राष्ट्र बैङ्कको गभर्नर नियुक्ति नगरेको भन्दै असन्तुष्टि जनाइन् ।
उनले गभर्नर पद खाली हुनु भनेको देशको अर्थतन्त्र नेतृत्वविहीन भएको सङ्केत रहेको बताइन् । गभर्नर कसको भागमा पर्ने भन्ने सौदाबाजीको खेलमा लागेर देशको अर्थतन्त्रको भविष्य दाउमा लगाइरहेको आरोप लगाइन् ।
उनले भनिन्, ‘गभर्नरको कार्यकाल सकिएको एक महिनाभन्दा बढी भइसक्यो। तर आजसम्म त्यो पद खाली छ। आजसम्म सरकार मौन र निर्णयविहीन भएर बसेको छ । यो देशको अर्थतन्त्र नेतृत्वविहीन भएको सङ्केत हो।’
त्यस्तै रास्वपाकी अर्की सांसद निशा डाँगीले गर्भनर नियुक्तिमा सरकारलाई समय खर्च नगर्न आग्रह गरिन् । उनले भनिन्, ‘मेरिटोक्रेसीका आधारमा पनि गभर्नर नियुक्ति गर्न सकिन्छ । सरकारको समय यस्तो हावादारी काममा खर्च नगर्न म सुझाव दिन्छु ।’
सरकारले भने गभर्नर नियुक्ति छिट्टै हुने बताउँदै आएको छ । मंगलबार आयोजित एक कार्यक्रममा कांग्रेस सभापति शेरबहादुर देउवाले गभर्नर नियुक्ति प्रधानमन्त्री केपी शर्मा ओलीका कारण ढिलाइ नभएको बताएका थिए ।
उनले भनेका थिए, ‘गभर्नरको विषयमा अहिले राजनीतिक समस्या छैन, ओलीजी पनि सकरात्मक नै हुनुहुन्छ, राष्ट्र बैंकभित्रकै समस्या हो ।’
गभर्नर पद खाली हुनु भन्दा एक महिनाअघि नै नयाँ गभर्नर नियुक्ति गर्नुपर्नेमा पद खाली भएको एक महिना बितिसक्दा पनि सरकारले नयाँ गभर्नर नियुक्त गर्न सकेको छैन ।
