विद्यालय शिक्षा ऐन निर्माणमा षड्यन्त्र भए ठूलो आन्दोलन गर्ने शिक्षक महासंघको चेतावनी
काठमाडौं । नेपाल शिक्षक महासंघले विगतमा भएको सहमति अनुसार शिक्षा ऐन निर्माण नभए ठूलो आन्दोलन गर्ने चेतावनी दिएको छ ।
बुधबार विज्ञप्ति जारी गरी महासंघले गरेर सहमति अनुसार ऐन निर्माण गर्न आग्रह गरेको हो । महासंघले स्थायी, राहत, साविक उमावि, सिकाइ अनुदान, बालकक्षा, अस्थायी÷करार, विशेष शिक्षा, प्राविधिक धार, संस्थागत विद्यालय लगायतका सबै खाले शिक्षक र विद्यालय कर्मचारीलाई गोलबन्द भएर सक्रिय रहन पनि आग्रह गरेको छ ।
विज्ञप्तिमा भनिएको छ, ‘विगतका सहमतिको अवस्था के छ ? कतै आम शिक्षक कर्मचारीको भावना र विगतका सहमति माथि षडयन्त्र त हुँदैछैन ? भन्ने जस्ता सन्देह पैदा भइरहेका छन् । यो अवस्थालाई मध्यनजर गरी हामी विगतका सबै सहमति सम्बोधन गर्ने खालको अग्रगामी ऐन निर्माण हुने र तोकिएको समय तालिकामा काम सम्पन्न भई जारी हुने पक्षमा निरन्तर खबरदारी गरीरहेका छौं ।’
चैत २० देखि काठमाडौं केन्द्रित आन्दोलन गरेको महासंघले २९ दिनको आन्दोलनपछि असार १५ भित्र ऐन जारी गर्ने सहमतिपछि आन्दोलन फिर्ता लिएको थियो ।
