बैंक अफ काठमाडौंका पूर्वसिइओ श्रेष्ठलाई एक करोड धरौटीमा रिहा गर्न सर्वोच्चको आदेश

काठमाडौं । सर्वोच्च अदालतले कीर्ते कागजातका आधारमा ऋण दिएको अभियोगमा थुनामा रहेका बैंक अफ काठमाडौंका पूर्वसिइओ अजय श्रेष्ठलाई रिहा गर्न आदेश दिएको छ ।

न्यायाधीशहरु सपना प्रधान मल्ल र कुमार रेग्मीको इजलासशबाट यस्तो आदेश भएको हो । बैंकर श्रेष्ठ र किरणकुमार बोहोरालाई जनही एक एक करोड धरौटी लिएर रिहा गर्न आदेश भएको हो । सर्वोच्चले उच्च अदालतबाट भएको दुवैलाई थुनामा राखी अनुसन्धान अघि बढाउन दिएको आदेश बदर गर्दै धरौटी मागेको हो ।

उच्च अदालतले दुवैलाई थुनामा पठाएपछि सर्वोच्च गएका थिए । बैंक अफ काठमाण्डूका पूर्व प्रमुख कार्यकारी अधिकृत श्रेष्ठसहित ११ जनालाई पाँच करोड रुपैयाँ ऋण दूरुपयोग बारे उजुरी परेपछि प्रहरीको केन्द्रीय अनुसन्धान ब्यूरोले गत असोजमा पक्राउ गरेको थियो। लुम्बिनी बैंकलाई मर्ज गर्नुअघि नै गएको ऋण दूरुपयोग भएको उजुरी परेको थियो।