प्रहरी महानिरीक्षक क्षेत्रीलाई दज्र्यानी चिह्न प्रदान
काठमाडौं । नवनियुक्त प्रहरी महानिरीक्षक शैलेश थापा क्षेत्रीलाई दज्र्यानी चिह्न प्रदान गरिएको छ । गृह मन्त्रालयमा बिहीबार आयोजित कार्यक्रममा गृह सचिव महेश्वर न्यौपानेले उनलाई दज्र्यानी चिह्न प्रदान गरेका हुन् । असार २३ गते मन्त्रिपरिषद् बैठकले वरीयतामा पहिलो नम्बरमा रहेका एआईजी थापालाई प्रहरी महानिरीक्षकमा बढुवा गर्ने गरेको थियो ।
३० वर्षे सेवाअवधिका कारण निवर्तमान आईजीपी ठाकुरप्रसाद ज्ञवालीले बुधबारदेखि अनिवार्य अवकाश पाएपछि सरकारले क्षेत्रीलाई आईजीपी नियुक्त गरेको हो । निवर्तमान आईजीपी ज्ञवालीलाई बुधबार प्रहरी प्रधान कार्यालयमा आयोजित एक कार्यक्रममा बिदाइ गरिएको थियो । थापाले आजैबाट महानिरीक्षकको कार्यभार सम्हाल्नेछन् । थापाले १९ वैशाख २०७९ सम्म नेपाल प्रहरीको नेतृत्व गर्नेछन्।
