कोइराला समूहको निष्कर्षः ०८४ र त्यसअघिको उपनिर्वाचनमा हुनसक्ने गठबन्धनका उम्मदेवार जिताउन कारबाही
काठमाडौं । नेपाली कांग्रेसका नेता डा. शेखर कोइराला समूहले पार्टीका नेताहरुमाथि गरिएको कारबाही विधानसम्मत नभएको निष्कर्ष निकालेको छ । बिहीबार बसेको कोइराला समूहको बैठकले अनुशासन उल्लंघनको नाममा गरिएको कारबाही विधानसम्मत नभएको निष्कर्ष निकालेको नेता राजेन्द्र बजगाईंले जानकारी दिए ।
उनले पार्टी विधानले उजुरी परेको ६ महिनाभित्र कारबाही गरिसक्नुपर्नेमा त्यस्तो नभएको बताए । बैठकमा पछिल्लो समय नेकपा एमाले र कांग्रेसमा कारबाहीको शृङ्खला उस्तै रहेकोले कांग्रेसले पनि एमालेबाट अनुसरण गरेको भन्ने विषयमा छलफल भएको बताए ।
उनले भने,‘नेकपा एमाले र नेपाली कांग्रेसको पार्टीभित्रको द्वन्द्व समानरुपमा हेर्न लायक छ । उनीहरुकोमा पनि कारबाहीको श्रृंखला छ र हामीले त्यसलाई अनुशरण गर्यौं भन्नेमा छलफल भयो । यी कारबाहीहरू २०८४ सालको र त्यसअघि हुने उपनिर्वाचनमा हुनसक्ने गठबन्धन र त्यसका उम्मेदवारलाई जिताउनेगरी गरिएको हुनसक्ने विषयमा छलफल भयो ।’
उनले बैठकले अनुशासन समितिले अनुशासन उल्लंघन गरेको निष्कर्ष निकालेको छ । नेता बजगाईंले कारबाहीमा परेका साथीहरुले पुनरावलोकनका लागि आवेदन दिने र बृहत भेला आयोजना गर्ने बताए ।
बैठकमा उपसभापति धनराज गुरुङले सभापति शेरबहादुर देउवा, उपसभापतिहरु र महामन्त्रीहरुकाबीचमा अहिले अनुशासन समितिको फाइल नचलाउने कुरा भएको तर हिजो अनुशासन समितिका संयोजक आनन्द ढुङ्गानाले समितिमै छलफल नगरी एक्कासी विज्ञप्ति निकालेर कारबाही गरिएकाले त्यसको प्रतिकार गर्ने निर्णय गरिएको कोइरालाका स्वकीय सचिव दिनेश थपलियाले जानकारी दिए ।
बैठकमा उपसभापति धनराज गुरुङ, सहमहामन्त्री जीवन परियार, नेताहरु अर्जुननरसिंह केसी, बलबहादुर केसी, अनुशासन समिति सदस्य संजय गौतम लगायत काठमाडौमा उपलब्ध केन्द्रीय सदस्यहरु सहभागी थिए ।
गत २०७९ को निर्वाचनमा पार्टीका आधिकारिक उम्मेदवारलाई असहयोग गरेको भन्दै कांग्रेसले प्रदेशका पूर्वमन्त्री, प्रदेश महामन्त्री, जिल्लाका वर्तमान र पूर्व सभापति, महासमिति सदस्य लगायत १८ जना नेचालाई कारबाही गरेको छ ।
