सरकारलाई लिङ्देनको आग्रहः विपक्षी विचारलाई आतङ्कित र निषेध गर्ने दृष्टिकोणहरू प्रस्तुत नगर्नुस्
काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले सरकारलाई गणतन्त्रप्रति आशा जगाउने काम गर्न आग्रह गरेका छन् ।
शुक्रबारको प्रतिनिधिसभा बैठकमा अध्यक्ष लिङ्देनले विपक्षीलाई आतंकित पार्नेभन्दा गणतन्त्रप्रति आशा जगाउने काम गर्न आग्रह गरेका हुन् ।
उनले भने, ‘विपक्षी विचारलाई आतङ्कित र निषेध गर्ने खाल्का दृष्टिकोणहरू प्रस्तुत गर्नुको बदला तपाईंको गणतन्त्रप्रति आशा जगाउने काम गर्नुस् । अघिल्लो सरकारले आशा जगाउने काम गरयो कि गरेन, तर प्रयत्न गर्छु भनेको थियो । अब पनि आशा जगाउने काम गर्नुस् ।’
अध्यक्ष लिङ्देनले उनले गणतन्त्र व्यवस्था विरुद्ध फरक मत राख्न पाइने भन्दै फरक विचारलाई नखेद्न आग्रह गरे । उनले फरक मत राख्नेका विरुद्ध कानुन बनाउनु नपाइने कुरा संविधानमा रहेको स्पष्ट पारे ।
संविधानमा व्यवस्थाको सम्बन्धमा समेत प्रश्न उठाउन सकिने व्यवस्था रहेको भन्दै उनले आफूहरूले उठाउँदै आएको एजेण्डा उठाउन संविधानले नरोक्ने बताए ।
उनले भने, ‘नेपालको सार्वभौमिकता भौगोलिक अखण्डता, जनतामा निहीत सार्वभौमिकताको प्रतिकूल हुने गरी संविधान संशोधन गर्न सकिने छैन, भनेपछि त्यसदेखि बाहेक गणतन्त्र, धर्मनिरपेक्षता, संघीयता त जहिल्यै पनि संशोधन गर्न सकिने रहेछ भन्ने कुरा त यो संविधानले नै प्रष्ट पारेको छ ।’
उनले अहिले मुलुकमा फजुल खर्च गर्ने संरचनाहरू रहेको उल्लेख गर्दै तिनलाई खारेज गरेर सरकार अगाडि जान सक्नुपर्ने बताए ।
