गगन थापा बैठकमा नजाँदा सत्ता गठबन्धनमा हलचल
काठमाडौं । सत्तारुढ दलहरूको बैठक बसिरहेको छ । प्रधानमन्त्री निवास बालुवाटारमा जारी बैठकमा संघीय संसदको दुवै सदनमा राष्ट्रपति रामचन्द्र पौडेलबाट प्रस्तुत हुने सरकारको आगामी आर्थिक वर्षको नीति तथा कार्यक्रमको तयारीलगायत विषयमा छलफल भइरहेको बताइएको छ ।
बैठकमा प्रधानमन्त्री एवं एमाले अध्यक्ष केपी शर्मा ओली, कांग्रेस सभापति शेरबहादुर देउवा, उपसभापति पूर्णबहादुर खड्का, परराष्ट्रमन्त्री डा. आरजु राणा देउवा, एमाले वरिष्ठ उपाध्यक्ष ईश्वर पोखरेल, महासचिव शंकर पोखरेल, उपमहासचिवहरू प्रदीपकुमार ज्ञवाली र विष्णुप्रसाद रिमाल, लोकतान्त्रिक समाजवादी पार्टी नेपालका अध्यक्ष महन्थ ठाकुर, जनता समाजवादी पार्टीका अध्यक्ष अशोकुमार राईलगायत सहभागी छन् ।
तर बैठकमा कांग्रेस महामन्त्री गगन थापा भने गएका छैनन् । पछिल्लो समय थापा सरकारको कामप्रति असन्तुष्ट छन् । जसका कारण उनले सत्तारुढ दलका बैठकमा भाग लिन छाडेका छन् । सरकारको कामकारबाही ट्याक्टरको गतिमा अघि बढेको भन्दै उनी असन्तुष्ट छन् ।
