‘वरिष्ठ बलराम’को प्रदर्शन मिति घोषणा
काठमाडौं । फिल्म ‘वरिष्ठ बलराम’ले रिलिज मिति घोषणा गरेको छ । टाइटल टिजर सार्वजनिक गर्दै निर्माणपक्षले रिलिज मिति घोषणा गरेको हो । निर्देशक सुरेन्द्र पौडेलका अनुसार यो फिल्म तिहारको लक्ष्मी पूजाका दिन कात्तिक ३ गते रिलिज हुनेछ ।
फिल्ममा दयाहाङ राई, विजय बराल, पशुपति राई, समृद्धि अर्याल, माओत्से गुरुङलगायत कलाकारको अभिनय रहनेछ । आशिष एच तामाङ र श्रीराज कार्की निर्माताका रूपमा रहेका छन् ।
निर्देशक पौडेलकै कथा र सम्पादन रहने फिल्मको पटकथा महेश दवाडीले लेखेका छन् । सामाजिक कथावस्तुमा आधारित फिल्मको छायाँकन तराईका विभिन्न स्थानमा गरिनेछ ।
तारानाथ न्यौपाने मुख्य सहायक निर्देशक रहेको फिल्ममा प्रशान्त शिवाकोटी संगीत, सम्राट शाक्य एक्सन र प्रदीप लामाको कोरियोग्राफी रहने छ । फिल्म वृषभ सिद्धी इन्टरटेनमेन्टको ब्यानरमा निर्माण हुनेछ ।
