टेस्ला र स्पेसएक्सको सहकार्यमा ‘उड्ने’ कार

ह्युस्टन । विद्युतीय कार निर्माता टेस्लाका प्रमुख कार्यकारी अधिकृत एलन मस्कले हावामा उड्न सक्ने प्रविधि जडित नयाँ रोडस्टर कार सार्वजनिक गरेका छन् । उनले टेक्सासस्थित स्पेसएक्सको परीक्षण केन्द्रमा आयोजित कार्यक्रममा थ्रस्टर जडित कार प्रदर्शन गरेका हुन् ।

टेस्लाको एक्स खाताबाट प्रत्यक्ष प्रसारण गरिएको कार्यक्रममा कारलाई ठाडो र्याम्पबाट उफारेर पुनः आफ्नै पाङ्ग्रामा अवतरण गराइएको थियो । उनले कारको सफलता सुनिश्चित नभए पनि यसले काम गर्ने सम्भावना रहेको बताए । मस्कका अनुसार कारमा हावाको दबाबबाट गाडीलाई माथि धकेल्न सक्ने अत्यधिक उच्च चापयुक्त हावाको ट्याङ्की जडान गरिएको छ ।

टेस्ला र स्पेसएक्सको संयुक्त क्षमताको चर्चा गर्दै मस्कले विश्वको उत्कृष्ट कार निर्माता र रकेट कम्पनीबीच सहकार्य हुँदा यस्तो प्रविधिको विकास सम्भव भएको बताए। उनले उक्त कार सन् २०२८ मा उत्पादनमा जाने जानकारी पनि दिए।

प्राविधिक जटिलता र नियामक चुनौतीका कारण उड्ने कारको अवधारणाले लामो समयदेखि व्यावहारिक रूप लिन सकेको छैन । यद्यपि, विद्युतीय मोटर र उच्च क्षमताका ब्याट्रीमा भएको प्रगतिले पछिल्ला वर्षमा यस्ता गाडीको विकासप्रति चासो बढाएको छ ।

अमेरिकी उड्डयन क्षेत्रका अग्रणी ग्लेन कर्टिसले सन् १९१७ मै उड्ने कारको पहिलो नमूना प्रस्तुत गर्नुभएको थियो । त्यसयता यस क्षेत्रमा विभिन्न प्रयास भए पनि व्यावसायिक रूपमा सफल उड्ने कारको विकास चुनौतीपूर्ण रहँदै आएको छ ।