जुलिअन असान्जलाई प्रेमिकासँग जेलमै विवाह गर्न अनुमति
जुलिअन असान्जले आफ्नी प्रेमिका स्टेला मोरिससँग वेलायतको बेल्मार्श कारागारमा विवाह गर्ने अनुमति पाएका छन् । विकिलीक्सका संस्थापक असान्ज र मोरिसका दुई सन्तान छन् । असान्ज एक्वडोरको लन्डनस्थित राजदूतावासमा बसेको बेला आफूले गर्भधारण गरेको मोरिसको भनाइ छ। त्यहाँ उनीहरूको नियमित भेटघाट हुने गरेको बताइएको छ ।
कारागार हेर्ने निकायका अनुसार कारागारका प्रशासकले असान्जको निवेदनलाई नियमित तरिकाले हेरेका थिए । मोरिसले विवाह गर्ने अनुमति पाएकोमा पीए समाचारसंस्थासँग खुसी व्यक्त गरेकी छन् । उने हाम्रो विवाहमा थप हस्तक्षेप नहुने आशा गरेको बताइन् । विवाहसम्बन्धी सन् १९८३ को एउटा कानुनका अनुसार कैदीबन्दीहरूले विवाह गर्न निवेदन दिन पाउँछन् ।
अनुमति पाउनेहरूले करदाताको कुनै सहायताबिना आफ्नो विवाहको सम्पूर्ण खर्च बेहोर्नुपर्छ । गत वर्ष द मेल अन सन्डे पत्रिकासँगको अन्तर्वार्तामा दक्षिण अफ्रिकामा जन्मिएकी मोरिसले आफू सन् २०१५ यता आफू असान्जसँग सम्बन्धमा रहेको खुलासा गरेकी थिइन् । पेसाले उनी वकिल हुन्। उनी अहिले एक्लै दुई छोरालाई हुर्काइरहेकी छन् ।
विकिलीक्सको यूट्यूब अकाउन्टमा प्रेषित एउटा भिडियोमा मोरिसले असान्जसँग सन् २०११ मा भेटेर उनको कानुनी टोलीमा काम गर्न थालेको बताएकी छन् । मोरिसले उनलाई दूतावासमा दिनहुँ भेट्न जाने गरेको र जुलिअनलाई राम्ररी चिन्न पाएको बताएकी छन् । ५० वर्षीय असान्ज जासुसीको अभियोगमा अमेरिका सुपुर्दगी गर्ने योजनाविरुद्ध कानुनी सङ्घर्ष गरिरहेका छन् ।
अमेरिकाको राष्ट्रिय सुरक्षासम्बन्धी विवरण चुहाएको भन्दै उनलाई अमेरिकामा मुद्दा चलाउन खोजिएको छ । विकिलीक्सले अफगानिस्तान र इराकमा भएका युद्धबारे चुहाइएका लाखौँ दस्ताबेज प्रकाशित गरेको थियो । त्यसमा अमेरिकी सैनिकहरूले इराकमा हेलिकप्टरबाट सर्वसाधारणहरूको हत्या गरेको देखिने भिडियो पनि पर्छ ।
अस्ट्रेलियाका नागरिक असान्ज सन् २०१९ यता बेल्मार्श कारागारमा छन् । एक्वडोरको दूतावासबाट निष्काशित भएपछि उनलाई जमानतका सर्तहरू उल्लङ्घन गरेको आरोपमा पक्राउ गरिएको थियो । सन् २०१२ देखि उनी उक्त दूतावासमा बसेर यौन दुर्व्यवहारको आरोपमा अभियोजन सामना गर्न जोगिएका थिए । उनले आफूमाथि लागेको अभियोगहरू सधैँ अस्वीकार गरे र अन्ततः ती खारेज भए।
