टोकियोलगायतका क्षेत्रमा आपतकाल घोषणा गरिने
पछिल्लो समय जापानमा कोरोना भाइरस संक्रमणमा उच्च वृद्धिभएसंगै टोकियो लगायतका मुख्य क्षेत्रमा आपतकाल घोषणा गरिने भएको छ । प्रधानमन्त्री योशिहिदे सुगाले सोमबार बिहान प्रधानमन्त्री निवासमा पत्रकार सम्मेलन गरी टोकियो महानगर लगायत साईतामा, चिबा र कानागावा प्रान्तमा संक्रमण उच्च रहेकोले आपतकाल घोषणा गर्न लागिएको जानकारी गराएका हुन् ।
उनले नयाँ कोरोना भाइरस विरुद्ध लड्न विशेष गरी टोकियो र छेउछाउका क्षेत्रहरुमा राती मानिसहरुको भिड़भाड कम गर्न भनेका छन् ।
विशेष गरि पेय पदार्थको बिक्री हुने स्थलहरुमा संक्रमणको जोखिम उच्च हुने बताउँदै प्रधानमन्त्री सुगाले रेस्टुरेन्टहरु ८ बजेसम्म मात्र संचालन गर्न अनुरोध गर्ने बताए ।
यस्तै, सरकारले सल्लाहकार समितिसँग परामर्श गरेर निर्णय गर्ने जनाएको छ। प्रधानमन्त्रीले यसहप्ताभित्र आपतकालीन घोषणा जारी गर्न समन्वय गरिरहेको जानकारी दिएका छन् । प्रधानमन्त्री सुगाले सकेसम्म फेब्रुअरी महिनाको मध्यबाट नागरिकहरुलाई कोरोना बिरुद्दको खोप उपलब्ध गराउने समेत बताएका छन् ।
उनले नीतिगत रुपमा सरकारले हाल नयाँ विदेशी नागरिकलाई जापनन प्रवेश रोकेको बताए । शनिबार टोकियो सहित चार छिमेकी क्षेत्रका गभर्नरहरूले आर्थिक पुनरुत्थान मन्त्री यासुतोशी निशिमुरासंग भेट गरेर कोरोनाभाइरस नियन्त्रणका लागि प्रभावकारी कदम चाल्न अनुरोध गरेका थिए ।