भारतमा दुई दिनमा १ लाख २० हजारभन्दा बढीलाई कोरोना संक्रमण
विश्वभर महामारीको रुपमा फैलिएको कोरोना भाइरस संक्रमितको संख्या १ करोड ९५ लाख नाघेको छ । चीनको वुहानबाट गत डिसेम्बरदेखि फैलिएको कोरोनाका कारण विश्वभर १ करोड ९५ लाख ३२ हजार ५ सय ३२ जना संक्रमित भएका छन् ।
संक्रमितमध्ये १ करोड २५ लाख ३७ हजार ८ सय ५४ जना उपचारपछि निको भएर घर फर्किएका छन् । यस्तै, कोरोना संक्रमणबाट ७ लाख २३ हजार १ सय ८४ जनाको मृत्यु भएको वल्डोमिटरमा उल्लेख छ।
संक्रमितमध्ये ६२ लाख ७१ हजार ४ सयभन्दा बढी विभिन्न अस्पतालमा उपचाररत छन् भने ६५ हजार १ सय भन्दा बढीको अवस्था गम्भीर रहेको छ ।
यस्तै, कोरोनाबाट सबैभन्दा बढी प्रभावित अमेरिकामा एकै दिन थप ६३ हजार २ सय ४६ जनामा संक्रमण पुष्टि भएपछि संक्रमित संख्या ५० लाख ९५ हजार ५ सय २४ पुगेको छ । संक्रमितमध्ये २६ लाख १६ हजार ९ सय बढी निको भएका छन् भने १ लाख ६४ हजार भन्दा धेरैको ज्यान गएको छ ।
यस्तै, ब्राजिलमा कोरोना भाइरसबाट सङ्क्रमित हुनेको संख्या २९ लाख ६७ हजार ६४ पुगेको छ भने ९९ हजार ७ सय बढीको मृत्यु भएको छ । संक्रमितमध्ये २० लाख ६८ हजार ३ सय भन्दा बढी निको भएका छन् ।
यस्तै छिमेकी मुलुक भारतमा दुई दिनमा १ लाख २० हजारभन्दा बढीलाई कोरोना भाइरसको संक्रमण भएको छ । पछिल्लो २४ घण्टामा सर्वाधिक ६१ हजार ४ सय ५५ जना कोरोना संक्रमित थपिएका छन् । यसअघि शुक्रबार भारतमा थप ६२ हजार १ सय ७० जना संक्रमित भएका थिए ।
भारतमा हाल २० लाख ८६ हजार ८ सयभन्दाबढी संक्रमित भएका छन् भने ४२ हजार ५ सय बढीको मृत्यु भएको छ । संक्रमितमध्ये १४ लाख २७ हजार ६ सय भन्दाबढी उपचार पछि निको भएका छन् ।
