कोरोना संक्रमणबाट भारतमा एकैदिन ४१० जनाको मृत्यु
भारतमा कोरोनाभाइरस सङ्क्रमितहरूको सङ्ख्या दिनदिनै वृद्धि हुँदै गएको छ । भारतमा पछिल्लो २४ घण्टामा १९ हजार ९०६ जना सङ्क्रमित भएका हुन् । भारतमा कुल सङ्क्रमितको सङ्ख्या पाँच लाख २८ हजार ८५९ पुगेको अधिकारीहरूले जानकारी दिएका छन् । भारतको केन्द्रीय स्वास्थ्य तथा परिवार कल्याण मन्त्रालयका अनुसार भारतमा अहिले पनि सङ्क्रमित अवस्थामै रहेकाहरूको सङ्ख्या दुई लाख तीन हजार ५१ पुगेको छ ।
त्यसैगरी कोरोनाभाइरसबाट सङ्क्रमित भएर पनि सङ्क्रमणमुक्त भई घर फर्केकाहरूको सङ्ख्या तीन लाख नौ हजार ७३१ पुगेको अधिकारीहरूले जनाएका छन् । भारतमा पछिल्लो २४ घण्टामा मात्रै कोरोनाभाइरसका कारण ४१० जनाको मृत्यु भएको पनि मन्त्रालयले जनाएको छ । योसँगै कुल मृतकको सङ्ख्या १६ हजार ९५ पुगेको जनाइएको छ ।
कोरोनाभाइरसबाट सवैभन्दा प्रभावित महाराष्ट्रमा मात्रै अहिलेसम्म एक लाख ५९ हजार १३३ जना सङ्क्रमित भएका छन् । त्यसैगरी केन्द्रीय राजधानीसमेत रहेको दिल्ली राज्यमा भने ८० हजार १८८ जना सङ्क्रमित भएको जनाइएको छ ।
