आफ्नो नियन्त्रणमा रहेका भारतीय सैनिक चीनद्वारा मुक्त

चीनले सीमा भिडन्तको क्रममा नियन्त्रणमा लिएको दशजना भारतीय सेनाका जवानलाई मुक्त गरेको छ । गत सोमबार भारत र चीन जोड्ने लद्दाखमा दुबै राष्ट्रका सेनाबीच भिडन्त हुँदा २० जना भारतीय सैनिकको मृत्यु भएको थियो । भारतीय सञ्चारमाध्यमलाई उद्धृत गर्दै बीबीसीले दश जना सिपाहीलाई मुक्त गरिएको उल्लेख गरेको छ ।

भारत सरकारले भने उक्त सूचनाको पुष्टि गरेको छैन । भारतले भिडन्तको क्रममा कुनै सिपाही हराएकोबारे पुष्टि गरेको छैन । चीनले भिडन्तको क्रममा भएको क्षति सम्बन्धमा खुलाएको छैन । चिनियाँ विदेश मन्त्रालयका प्रवक्ता जाओ लिचियानले भने चीनतर्फ पनि क्षति भएको बताएका थिए ।

तर दुबै देशका नागरिकस्तरमा पर्नसक्ने नकारात्मक प्रभाब र संवेदनशिलतालाई ध्यानमा राखेर चीनले संख्या नखुलाएको बताइएको छ । भारततर्फ भने एकजना कर्णेलसहित २० जना सेनाको मृत्यु भएको थियो । ७६ जना घाइते भएका थिए । गत् सोमबार भारत र चीनको सेनाबीच सीमा जोड्ने लद्दाखको गलवान नदी छेऊमा भिडन्त भएको थियो ।