यु–१९ एसिया कप क्रिकेटमा नेपाल श्रीलङ्कासँग पराजित
काठमाडौँ । यु–१९ एसिया कप क्रिकेटको पहिलो खेलमा नेपाल श्रीलङ्कासँग पराजित भएको छ । शुक्रबार युएईको शारजहास्थित शारजहा क्रिकेट रङ्गशालामा भएको खेलमा नेपाल श्रीलङ्कासँग ५५ रनले पराजित भएको हो ।
टस जितेर व्याटिङको निम्तो पाएको श्रीलङ्काले नेपाललाई दुई सय ३४ रनको लक्ष्य दिएको थियो । सो लक्ष्य पछ्याउने क्रममा नेपालले सबै विकेट गुमाएर जम्मा १७८ रन मात्र बनायो ।
श्रीलङ्काका लागि शरुजन षणमुगनाथनले सर्वाधिक ६२ रन बनाए । उनले ९९ बलमा दुई चौकाको मद्दतले ६२ रन बनाएका हुन् । लकविन अवेसिङ्घेले ५० रनको योगदान दिए ।
उनले ५३ बलमा एक छक्का र दुई चौकासमेत प्रहार गरे । दुल्निथ सिगेरा र विमथ दिनसाराले समान २४÷२४ रन बनाए । श्रीलङ्काका लागि कविजा गमागेले नटआउट ३७ रनको योगदान दिए ।
त्यस्तै, कप्तान विहास थेवमिकाले तीन, कुगदास मथुलन, पुलिन्दु परेरा र प्रवीण मनिषाले समान दुई/दुई रन बनाए । विरन चामुदिथाले एक रन पनि जोड्न सकेनन् । नेपालका लागि सन्तोष यादवले सर्वाधिक ४ विकेट लिए । यस्तै, युवराज खत्रीले दुई, हेमन्त धामी र नरेन साउदले समान एक÷एक विकेट हात पारे ।
