तेक्वान्दो खेलाडीलाई पोशाक वितरण
काठमाडौं । नेपाल तेक्वान्दो संघले पारा राष्ट्रिय टिमलाई ट्रयाक सुट तथा खेलपोशाक वितरण गरेको छ ।
बुधबार सातदोबाटोस्थित तेक्वान्दो संघको केन्द्रीय कार्यालयमा कांग्रेसका खेलकुद विभाग प्रमुख मोहन बस्नेतको आतिथ्यतामा पारा राष्ट्रिय टिमका खेलाडीलाई ट्रयाक सुट तथा खेल पोशाक वितरण गरिएको हो । तेक्वान्दो खेलाडी संगीना वैद्य र रवि महर्जनले संयोजन गरेको कार्यक्रममा खेलाडीलाई ट्रयाक, जुत्ता, ब्याग र टिसर्ट प्रदान गरिएको थियो । कार्यक्रममा बस्नेतले खेल र खेलाडीको विकास आफूहरुको प्राथमिकता रहेको बताए ।
तेक्वान्दोकी पूर्वखेलाडी तथा प्रशिक्षक संगीना वैद्यले विभिन्न सहयोगी संस्था तथा व्यक्तिसँग सहकार्य गरेर पारा खेलाडीलाई खेल सामग्री जुटाईएको जानकारी दिइन् । कार्यक्रममा नेपाल तेक्वान्दो संघका महासचिव दीपराज गुरुङले कोरोनाले थला परेको घरेलु खेलकुदको समयमा सराहनीय काम गरेको भन्दै प्रशंसा गरेका थिए ।
संघका अनुसार बज्र सेक्युरिटीले ट्रयाक, गोदावरीले जुत्ता, स्तम्भ बहुउद्देश्यीय सहकारीले ब्याग र पूर्वकराते खेलाडी विनोद महर्जन र उमेश मल्लले टिसर्ट सहयोग गरेका हुन् ।
