बाँकेमा भएको सवारी दुर्घटनामा १२ जनाको मृत्यु, २१ घाइते
नेपालगञ्ज । पूर्व–पश्चिम राजमार्ग अन्तर्गत बाँकेको राप्तीसोनारीस्थित ठुरिया जंगलमा गाडी दुर्घटना हुँदा १२ जनाको मृत्यु भएको हो ।
प्रहरीका अनुसार, नेपालगञ्जबाट सल्यान गइरहेको ना ५ ख ५९९५ नम्बरको हाइस गाडी रोकिराखेको बा ४ ख ९०६४ नम्बरको ट्रकमा ठोक्किँदा ११ जनाको घटनास्थलमै र एक जनाको उपचारका क्रममा मृत्यु भएको हो ।
दुर्घटना आइतबार मध्यराति भएको प्रहरीले जनाएको छ । भेरी अस्पतालका मेडिकल सुपरीटेन्डेन्ट डा. प्रकाश थापाका अनुसार ११ पुरुष र एक महिलाको मृत्यु भएको छ ।
दुर्घटनामा २१ जना घाइते भएका छन् । घाइतेको भेरी अस्पताल, नेपालगञ्जमा उपचार भइरहेको छ । घाइते मध्ये तीन जनाको अवस्था गम्भीर रहेको बताइएको छ ।
