पत्रकार वीरेन्द्र साहका हत्या आरोपी कुन्दन फौजदार पक्राउ
बारा । पत्रकार वीरेन्द्र साहका हत्या आरोपी कुन्दन फौजदारलाई प्रहरीले पक्राउ गरेको छ । १२ वर्षदेखि फरार रहेका बारागढी गाउँपालिका वडा नम्बर ६ का फौजदारलाई प्रहरीले शनिबार राति पक्राउ गरेको हो ।
फौजदारलाई पक्राउ गर्ने क्रममा प्रहरीले ४ राउन्ड हवाई फायरसमेत गरेको थियो । एभिन्यूज टेलिभिजनमा कार्यरत साहलाई २०६४ असोज १८ गते पिपरा बजारबाट अपहरण गरी तत्कालीन नेकपा (माओवादी)ले टाँगिया बस्ती जंगलमा लगेर हत्या गरेको थियो । हत्यारामध्येका दुई जना फरार छन् । फौजदारसम्बन्धी मुद्दा मुलतवीमा रहेकोले उनलाई अदालतमा बुझाइने प्रहरीले जनाएको छ ।
