पार्टीभित्रको विवाद समाधान भई पार्टी एकताबद्ध ढंगले अघि बढ्छः नेता पाण्डे
काठमाडौं । सत्तारुढ दल नेपाल कम्युनिष्ट पार्टी (नेकपा) का स्थायी कमिटी सदस्य सोमप्रसाद पाण्डेले पार्टीभित्रको विवाद हल हुने र पार्टी एकताबद्ध ढंगले अघि बढ्ने दाबी गरेका छन् । काठमाडौंमा शनिबार आयोजित साक्षात्कारमा पाण्डेले नेताहरुबीच सघन छलफल तथा वार्ता भैरहेकोले विवाद छिट्टै हल हुनेमा आफू पूर्ण विश्वस्त रहेको बताए ।
पार्टी चाहिँ विभाजन नहुने भन्दै उनले विधि र पद्धति कायम गर्दै अग्रगमन कायम गर्दै अघि बढ्ने कुरा मुख्य कुरा भएको बताए । पाण्डेले संविधान कार्यान्वयन भैसकेको अवस्था सुनाउँदै अब मुलुकलाई एउटा नयाँ दिशामा लैजानुपर्ने बताए । स्थायित्व दिँदै मुलुकको समृद्धिमा लाग्नुपर्ने आमजनताको चाहना रहेको उल्लेख गर्दै पाण्डेले सरकारले जनताको अपेक्षा पुरा गर्ने धारणा राखे ।
त्यस्तै उनले सानो/सानो समूह र झुण्डहरु गणतन्त्रको विरुद्धमा नारा लगाएको भएपनि राजतन्त्र यो देशमा नफर्किने जिकिर गरे । साक्षात्कारमा कांग्रेसका नेता रमेश लेखकले संवैधानिक परिषदसम्बन्धी सरकारले ल्याएको अध्यादेश संविधान र लोकतान्त्रिक पद्धतिको खिलाफमा भएकोले त्यो फिर्ता र निस्क्रिय हुनुपर्ने बताए ।
अध्यादेश संविधानको मर्म र भावनाको खिलाफमा रहेको भन्दै उनले कांग्रेस यसको पक्षमा नरहेको स्पष्ट पारे । नेता लेखकले मन्त्रिपरिषदले राष्ट्रपतिकहाँ सिफारिश हुँदापनि मन्त्रीहरुलाई थाहा नहुनुले यो अपारदर्शी भएको भएको जिकिर गरे ।
