शंखधर उद्यानमा पद्यरत्न र शंखधर साख्वाको शालिक स्थापना
काठमाडौं । काठमाडौंको शंखधर उद्यानमा राष्ट्रिय विभूति शंखधर साख्वाः र मानवअधिकारवादी, भाषा तथा जातीय समानताको आन्दोलनमा महत्वपूर्ण योगदान गरेका पद्मरत्न तुलाधरको शालिक स्थापना गरिएको छ । काठमाडौँ महानगरपालिकाले रानीपोखरी नजिकै रहेको शंखधर उद्यानमा निर्माण भएको शालिकको शनिबार शहरी विकासमन्त्री कृष्णगोपाल श्रेष्ठले अनावरण गरे ।
अनावरणपछि मन्त्री श्रेष्ठलगायतले शालिकमा माल्यार्पण गरेका थिए । कार्यक्रममा मन्त्री श्रेष्ठले यसअघिको रत्नपार्क अर्थात् हालको शंखधर उद्यानमा महानगरपालिकाले शालिक निर्माण गर्नु सकारात्मक बिषय भएको बताए ।
मन्त्री श्रेष्ठले अब काठमाडौं शहरलाई व्यवस्थित पारिने आश्वासन दिए । काठमाडौंका सडकमा रहेका खाल्डाखुल्डी पुर्ने कामको सुरुवात गरिएको र त्यसको निरन्तर अनुगमन गरिने उनले बताए । उनले सरकारले धेरै नै राम्रा काम गरेको भन्दै सरकारले राम्रा कामको प्रसंसा गर्नुपर्ने बताए ।
त्यस्तै काठमाडौं महानगरका प्रमुख विद्यासुन्दर शाक्यले राज्यस्तरबाट शालिक निर्माण गर्ने क्रम सुरु भएको तर्क गरे । कोरोनाका बेला पनि महानगरले जनताकेन्द्रित कार्य गरेको उनले बताए । उनले काठमाडौं महानगरको स्वरुप विस्तारै परितर्वन हुदै गएको दावी गरे । करिब २० लाख रुपैयाँको लागतमा महेश तुलाधरले उक्त शालिक निर्माण गरेका थिए ।
