सरकारकै बेवास्ताका कारण कोरोना फैलिएको विप्लवको आरोप
काठमाडौं । नेकपाका महासचिव नेत्रविक्रम चन्द विप्लवले कोरोना भाइरसको महामारी नियन्त्रणका लागि विशेष पहल गर्न सरकारलाई आग्रह गरेका छन् । शनिबार विज्ञप्ती जारी गरी विप्लवले स्वास्थ्य परीक्षणलाई गाउँगाउँमा पुर्याएर महामारी नियन्त्रणको पहल गर्न आग्रह गरेका हुन् ।
उनले सरकारले यसको रोकथामका लागि सुरुमै सीमा बन्द गर्नुपर्नेमा त्यसो नगरेका कारण अहिले स्थिति भयावह भएको आरोपसमेत लगाएका छन् ।
उनले सीमा क्षेत्रमा अलपत्र परेका नेपालीलाई क्वारेन्टाइनमा राखी खानपानको व्यवस्था गर्न, लकडाउनका कारण समस्यामा परेका मजदूर वर्गको खानपानको व्यवस्था गर्नसमेत माग गरेका छन् । त्यस्तै उनले कोरोना महामारी रोक्न आफ्नो पार्टीले सक्दो सहयोग गर्ने तर स्वास्थ्य सामग्री खरिदमा अनियमितताविरुद्ध भने भण्डाफोर गर्ने उल्लेख गरेका छन् । 
