‘सभामुखज्यू ! तपाईंको कुर्सीमा अरु कसैको आँखा लागेको छ कालोटिका लगाउनुस्’
काठमाडौं । सत्तारुढ नेपाल कम्युनिष्ट पार्टीका सांसद विरोध खतिवडाले सभामुख अग्नि सापकोटालाई बैठकको अध्यक्षता गरिरहेको कुर्सीमा कालो टीका लगाउन सुझाव दिएका छन् ।
बुधबारको प्रतिनिधिसभा बैठकमा सांसद खतिवडाले सभामुखको कुर्सीमा अरु कसैको आँखा लागेको भन्दै कालो टीका लगाउनु सुझाव दिएका हुन् ।
उनले भने, ‘सभामुखज्यू तपाईंको कुर्सीमा आँखा पर्यो, शिवले माया गरेर तुम्बा समातेर कैलाशमा बसे जस्तै तपाईंले पनि कुर्सीको जतन गर्नु पर्यो’, उनले भने, ‘बच्चाहरुलाई पनि आमाले अरुको आँखा पर्न नदिन कालो निधार या अन्त कालो टीको लाइदिने गर्छन्। तपाईंले पनि त्यो कुर्सीमा अरुको आँखा लाग्न नदिन कुर्सीको खुट्टा या ढाडमा कालो लाउने हो कि।’
सभामुख सापकोटाले सन्तुलित ढंगले संसद चलाउँछु भन्दा पनि सुरुमै अवरुद्ध भएको खतिवडाले बताए ।