कार्यसम्पादन मूल्यांकन नै नगरी स्पष्टीकरण माग गरिएको विषय आफैँमा अपरिपक्व र अनुचित छ: कुलमान घिसिङ
काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङले आफूलाई पदबाट हटाउने अधिकार मन्त्रालयलाई नभएको जवाफ दिएका छन् ।
उर्जा मन्त्रालयले सोधेको स्पष्टीकरणको जवाफ दिँदै घिसिङले आफूलाई स्पष्टीकरण सोध्ने र कारबाही गर्ने अधिकार मन्त्रालयलाई नभएको जवाफ दिएका हुन् ।
उनले ऊर्जा मन्त्रालयलाई बुझाएको जवाफमा उनले आफूमाथि लगाइएका आरोप अस्वीकार गर्दै मन्त्रालयको कदमलाई कानूनी र न्यायिक सिद्धान्तको विपरीत भनेका छन् । उनले आफ्नो नियुक्ति मन्त्रिपरिषद्ले गरेको र मन्त्रालयसँग आफूलाई पदमुक्त गर्ने अधिकार नरहेको बताएका छन् ।
जवाफमा उनले भनेका छन्, ‘म मन्त्रिपरिषद् बैठकबाट नेपाल विद्युत प्राधिकरण ऐन, २०४१ को दफा १७ (१) बमोजिम ४ वर्षको लागि नियुक्त भएको हुँ र मलाई सेवाबाट हटाउने अधिकार नेपाल सरकारको कार्य सञ्चालन नियमावली र सम्बन्धित विनियमावली अनुसार छैन ।’
दुई दिनअघि मन्त्रालयले घिसिङलाई २४ घण्टे स्पष्टीकरण सोधेको थियो । घिसिङमाथि सरकारको सहमतिबिना भारतबाट आयात गरेको विद्युतमा महसुल वृद्धि गरेको भन्दै स्पष्टीकरण सोधिएको हो ।
