माओवादी नेता बन्जाडेको सवारी दुर्घटनामा मृत्यु
बुटवल । नेकपा माओवादी केन्द्रका केन्द्रीय सदस्य रामप्रसाद बन्जाडेको सवारी दुर्घटनामा परी निधन भएको छ । बुटवलको जितगढीमा मंगलबार साँझ दुर्घटनामा परेका बन्जाडेको बुधबार बिहान बुटवलको मर्सीसिटी अस्पतालमा उपचारका क्रममा निधन भएको नेकपा माओवादी केन्द्रका रुपन्देही अध्यक्ष निर्मल जिसीले जानकारी दिएका छन् ।
बन्जाडे सवार लु २६ प५८९८ नम्वरको मोटरसाइकललाई ना ५ ख ९०६ नम्बरको यात्रु बसले ठक्कर दिएको थियो। बन्जाडे सवार मोटरसाइकल जितबहादुर राना मगरले चलाएका थिए । उनी समेत घाइते छन् । बुटवलको जितगढीका स्थायी बासिन्दा ५६ वर्षीय बन्जाडेका श्रीमती एक छोरा र एक छोरी छन्।
