राष्ट्रपतिको पारिवारिक विवरण संकलनसँगै सुरु भयो राष्ट्रिय जनगणना
काठमाडौँ । राष्ट्रपति विद्यादेवी भण्डारीको पारिवारिक विवरण संकलनसँगै राष्ट्रिय जनगणना २०७८ सुरु भएको छ । केन्द्रीय तथ्यांक विभागबाट गएको गणकको टोलीले बिहीबार बिहान राष्ट्रपति भण्डारीको परिवारिक विवरण संकलन गरेको थियो ।
जनगणनाका लागि तयार गरिएको प्रश्नावली राष्ट्रपति भण्डारीलाई सोधिएको थियो । बिहीबारदेखि सुरु भएको जनगणना मंसिर ९ मा सकिनेछ । मुलुक संघीय संरचनामा गएपछि पहिलोपटक जनगणना सुरु भएको हो ।
राष्ट्रपति भण्डारीको परिवारिक विवरणपछि उपराष्ट्रपति नन्दबहादुर पुन र प्रधानमन्त्री शेरबहादुर देउवाको परिवारको जनगणना गरिएको छ । जनगणनाका लागि देशभर ८ हजार ५ सय सुपरीवेक्षक र ४० हजार गणक कर्मचारी खटाइएका छन् । एक जना गणकले कम्तीमा दिनमा १२ परिवारको लगत लिनुपर्ने हुन्छ । जनगणनाको १५ दिने अवधिमा एक जना गणकले सरदर १ सय ७५ घरपरिवारको लगत लिनुपर्नेछ ।
