मुख्यमन्त्री आचार्यको पदको छिनोफानो आइतबार मात्र
विराटनगर । प्रदेश एकका मुख्यमन्त्री भीम आचार्यले आइतबार विश्वासको मत लिने भएका छन् । शुक्रबारको प्रदेश सभा बैठकमा मुख्यमन्त्री आचार्यले विश्वासको मत लिने प्रस्ताव पेस गरिसकेका छन् ।
संविधानको धारा ११८ को उपधारा २ बमोजिम आफूमाथि प्रदेश सभामा विश्वास छ भनी उनले प्रस्ताव पेस गरेका हुन्। त्यसपछि सभामुख प्रदीपकुमार भण्डारीले कात्तिक ७ गते आइतबार मध्यान्ह १२ः३० बजे बस्ने बैठकमाा विश्वासको मत सम्बन्धी प्रस्तावमा मत विभाजित हुने भन्दै आजको बैठक स्थगित गरेका छन् । सरकारको नेतृत्वकर्ता एमाले विभाजन भएपछि आचार्य अल्पमतमा छन्।
एमालेका १० जना प्रदेश सभा सदस्यले एकीकृत समाजवादी रोजेका छन् । कुल ९३ सदस्य रहेको प्रदेश सभामा मुख्यमन्त्रीको पक्षमा ४१ जना सांसद मात्रै छन्। गठबन्धनमा कांग्रेस २१, माओवादी केन्द्र १५, एकीकृत समाजवादी १० र जसपा ३ जना गरी गठबन्धनमा ४९ जना सांसद छन् । गठबन्धनले नेकपा (एकीकृत समाजवादी)का सांसद राजेन्द्र राईलाई मुख्यमन्त्रीका रूपमा अघि सारेको छ ।
