पाण्डे र भट्टलाई तत्काल कारवाही नगर्न सर्वोच्चको आदेश
काठमाडौं । प्रतिनिधिसभा सदस्य सोमप्रसाद पाण्डे र राष्ट्रियसभा सदस्य शारदादेवी भट्टलाई कारवाही नगर्न सर्वोच्च अदालतले अल्पकालिन अन्तरिम आदेश दिएको छ ।
आइतबार न्यायाधीश मीरा खड्काको इजलासले अन्तरिम आदेशका लागी भदौ २९ मा छलफलमा बोलाउन आदेश गर्दै अल्पकालिन अन्तरिम आदेश दिएको हो । एमाले विभाजन गरी नेकपा एकीकृत समाजवादी गठन गर्दा निर्वाचन आयोगले सनाखतमा समावेश नगराएको भन्दै आयोगको उक्त निर्णयविरुद्ध एमाले सांसदहरु सोमप्रसाद पाण्डे र शारदा भट्ट सर्वोच्च अदालत पुगेका थिए ।
माधव नेपाल नेतृत्वको पार्टी दर्ताका लागी निवेदन दिँदा हस्ताक्षर नगरेका उनीहरुले सनाखत गर्न पछि निवेदन दिएका थिए । निर्वाचन आयोगले उनीहरुलाई सनाखत गराएको थिएन ।
