दार्चुला तुईन घटना र अनधिकृतरुपमा हेलिकप्टर उडाइएकोबारे सरकारले भारतलाई पठायो पत्र
काठमाडौँ । सरकारले दार्चुला तुइन घटना र नेपाली आकाशमा अनाधिकृत रुपमा हेलिकोप्टर उडाइएकोबारे भारत सरकारलाई छुट्टाछुट्टै कूटनीतिक नोट पठाएको छ । परराष्ट्र मन्त्रालय परराष्ट्र मन्त्रालयकी प्रवक्ता सेवा लम्सालले दुवै पत्र कूटनीतिक च्यानल मार्फत् पठाइएको जानकारी दिएकी छन् ।
ती घटनाहरूमा सरकारले मौनता साँधेको भन्दै सर्वत्र आलोचना भएपछि घटना भएको सरकार कूटनीतिक नोट पठाउन बाध्य भएको हो । साउन १५ मा महाकाली नदी तर्ने क्रममा भारतीय सशस्त्र सुरक्षा (एसएसबी)ले तुइन चुँडाइ दिँदा दार्चुलाका जयसिंह धामी महाकाली नदीमा बेपत्ता भएका थिए ।
उनी बेपत्ता भएको घटनाको छानबिनका लागि सरकारी समिति गठन गरिएको थियो । समितिले पनि एसएसबीको संलग्नता रहेको उल्लेख गर्दै यो विषयलाई कूटनीतिक तबरबाट अघि बढाउन सरकारलाई सुझाव दिएको थियो । छानबिन समितिले समेत ठहर गरिसक्दा पनि सरकार चुपचाप बसिरहेको थियो ।
तर सर्वत्र सरकारको आलोचना भएपछि सरकारले कुटनीतिक नोट पठाएको हो । त्यस्तै तुइन घटनाको विषयमा सरकार मौन रहेकै बेला भारतले नेपाली सेनाको ब्यारेकमाथि नै अनधिकृत रुपमा हेलिकोप्टर उडाएको थियो । त्यो विषयमा पनि सरकार चुपचाप थियो ।
