बिस्काः जात्रा नरोक्न सर्वोच्चको आदेश
काठमाडौं । सर्वोच्च अदालतले भक्तपुरमा मनाइने बिस्काः जात्रा नरोक्न अन्तरिम आदेश दिएको छ । जिल्ला प्रशासन कार्यालय भक्तपुरले कोरोना संक्रमण बढेको भन्दै जात्रा रोक्ने निर्णय गरेपछि अधिवक्ता राजकुमार सुवालले रिट दायर गरेका थिए ।
न्यायाधीश पुरुषोतम भण्डारीको एकल इजलासले त्यसमा प्रारम्भिक सुनुवाई गर्दै जात्रा नरोक्न अन्तरिम आदेश जारी गरेको हो । यता भक्तपुर नगरपालिकाले पनि सभ्य र शान्तिपूर्ण तरिकाले सञ्चालन गर्ने निर्णय गरिसकेको थियो ।
नगरपालिकाद्वारा बुधबार डाकिएको बैठकले रथ तान्ने र यसिं (लिंगो) पनि ठ्ड्याउने निर्णय गरेको हो । त्यसअघि सांसद प्रेम सुवाल र नगरपालिका जनप्रतिनिधि लगायतको टोलीले प्रमुख जिल्ला अधिकारीलाई भेटेर जात्रा रोक्ने निर्णय सच्याउन आग्रह गरेको थियो । बिस्काः जात्रा चैत २८ बाट हुँदैछ ।