भोक लाग्यो सरकार, काम गरी खान देउ
काठमाडौं । ट्याक्सी चलाउन पाउनुपर्ने माग गर्दै ट्याक्सी व्यवसायीहरु आन्दोलनमा उत्रिएका छन् । रोगले नभई भोकले मर्ने अवस्था आएको भन्दै ट्याक्सी व्यवसायीहरु ट्याक्सी सञ्चालन गर्न दिन माग गर्दै ट्याक्सी लिएर सडक आन्दोलनमा उत्रिएका हुन् । आफूहरुको मागको सम्बधोन नभएकाले बाध्य भएर आफूहरु आन्दोलनमा उत्रिएको उनीहरुले बताएका छन् ।
अखिल नेपाल यातायात मजदुर संघ बागमती प्रदेशका अध्यक्ष दीपक केसीले सरकारलाई असार १५ गते सम्म आफ्नो माग सम्बोधन गर्न समय दिइएको तर सरकारले बेवास्ता गरेपछि विरोध स्वरुप ट्याक्सीको चाबी यातायात व्यवस्था विभाग मार्फत सरकारलाई बुझाइएको जानकारी दिएका छन् ।
ट्याक्सी संचालन गर्न नपाउँदा बैंकको किस्ता तिर्न समस्या भएको र बैंकले ट्याक्सी नै लिलाम गर्ने अवस्था आएकाले यातायात व्यवस्था विभाग मार्फत सरकारलाई चाबी बुझाइएको व्यवसायीले बताएका छन् । सरकारले आफूहरुको माग सम्बोधन नगरे उपत्यकामा भएका सबै ट्याक्सी सिंहदरबारमा लगेर बुझाउने चेतावनी समेत उनीहरुले दिएका छन् ।
