प्रतिरोध क्षमता राम्रो भएकै कारण नेपालमा कोरोनाबाट मृत्यु हुनेको संख्या कम : प्रधानमन्त्री
काठमाडौं । प्रधानमन्त्री केपी शर्मा ओलीले प्रतिरोध क्षमता राम्रो भएकै कारण नेपालमा कोरोनाबाट मृत्यु हुनेको संख्या कम भएको बताएको दाबी गरेका छन् । राष्ट्रियसभाको बिहीबारको बैठकमा प्रधानमन्त्री ओलीले अहिलेसम्म २० जनाको मृत्यु भएपनि ती सबै कोरोना संक्रमणबाट मृत्यु नभएको दाबी गरेका हुन् ।
उनले अरु रोगले मृत्यु भएपनि विश्व स्वास्थ्य संगठनको मापदण्डका कारण सबैको मृत्यु कोरोनाका कारण भएको मान्नुपर्ने बताए । उनले पछिल्लो समय भारतबाट अत्यधिक मान्छे नेपाल आएकाले कोरोनाको संक्रमण वृद्धि भएको भन्दै सरकारले कोरोना भाइरसको परीक्षण बढाउने तयारी गरिरहेको जानकारी दिए ।
उनले बाहिरबाट भन्न सजिलो भएपनि लाखौंको परीक्षण र क्वारेन्टाइन व्यवस्थापन गर्न गाह्रो रहेको बताए । उनले स्थानीय तहहरूले प्रभावकारी काम गरेको भन्दै यहीबेला खर्चको हिसाव किताव खोजिएको भन्दै आपत्ति जनाए ।
प्रधानमन्त्रीले नेपाल भिखारीहरुको देश नभएको बताए । आफ्नो सरकार बनेपछि नेपालमा कसैले मागेर खानु नपरेको दाबी गरे। ‘माननीयज्यूहरुले गर्वले भन्नुभए हुन्छ, नेपाल भिखमंगाहरुको देश होइन । यहाँ बाँच्नकै लागि कसैले सडकमा याचना गर्नुपर्दैन । खानेके लिए कुछ देदो भन्नुपर्दैन ।’, प्रधानमन्त्री ओलीले भने । सरकारले गरेका राम्रा कामहरुको प्रचार नभएको भन्दै ओलीले १० अर्बको हिसाब माग्नेहरु सरकार विरोधी भएको बताए ।
