एमसीसी खारेज गर्न गणतान्त्रिक मोर्चाको माग
काठमाडौं । देशभक्त जनगणतान्त्रिक मोर्चा, नेपालले मिलेनियम च्यालेन्ज कर्पोरेशन (एमसीसी) सम्झौता खारेज नभएसम्म संघर्ष जारी राख्ने जनाएको छ । एमसीसी सम्झौता खारेज गर्नुपर्ने माग राख्दै शुक्रबार काठमाडौंको माइतीघरमा विरोध प्रदर्शन गर्दै मोर्चाले संघर्षलाई निरन्तरता दिने जनाएको हो । मोर्चाले सम्झौता मुलुकको राष्ट्रियता र अखण्डताको हित विपरित रहेको भन्दै एमसीसी खारेज गनुपर्नेसहितका प्लेकार्डसहित बिरोध प्रदर्शन गरेको थियो ।
प्रदर्शनमा मोर्चाका अध्यक्ष सी.पी. गजुरेलले मुलुक बचाउन क्रान्तिकारी शक्ति एक हुनुपर्ने बेला आएको बताए । प्रदर्शनमा सहभागी भएकाहरुले एमसीसी खारेज गर्न माग गर्दै चर्का नारा लगाउँदै विरोध प्रदर्शन गरेका हुन् । उनीहरुले एमसीसी राष्ट्रको हितमा नरहेको भन्दै सरकार बिरोधी नारा लगाएका थिए । एमसीसी सम्झौता राष्ट्रघाती रहेको दाबीसहित त्यसलाई पारित गर्न नहुने भन्दै सदन र सडकमा विरोध चर्किरहेको छ ।