विदेशबाट नेपालीको उद्दारका लागि आठ वटा विमान तयारी अवस्थामा
काठमाडौं । संसदको उद्योग तथा वाणिज्य र श्रम तथा उपभोक्ता हित समितिले भारतीय सीमाबाट नेपाल भित्रेर क्वारेन्टाइनमा बसेका नेपालीहरुको दुई साताभित्र पीसीआर परीक्षण गर्न सरकारलाई निर्देशन दिएको छ ।
मंगलबार बसेको समिति बैठकले नेपाल भित्रिएको लामो समयसमम्म पनि पीसिआर जाँच नभएको गुनासो आएको भन्दै नेपााल आएको दुई साताभित्र पीसीआर परीक्षण गर्न सरकारलाई निर्देशन दिएको हो । समितिले विदेशबाट आउने शसक्त, महिला, गर्भवती महिला, जेष्ठ नागरिक लगाएतको पनि निःशूल्क स्वास्थ परिक्षण गर्न सरकारलाई निर्देशन दिएको छ । बैठकले बिभिन्न देशबाट नेपाल फर्कने र नेपालभित्र रहेका श्रमिकहरुको लागि रोजगारीको व्यवस्था गर्न पनि सरकारलाई निर्देशन दिएको छ ।
नेपाल आउनैपर्ने अवस्थामा नेपाल ल्याउने सरकारको निर्णयलाई स्वागत गर्दै कोरोना नियन्त्रणका लागि शसक्त रुपमा अघि बढ्न पनि सरकारलाई निर्देशन दिएको छ । बैठकमा प्रधानमन्त्री कार्यालयका सचिव नारायणप्रसाद बिडारीले बिदेशमा अलपत्र परेका नेपालीहरुलाई नेपाल ल्याइ व्यवस्थापन गर्ने बिषयमा तयारी भइरहेको जानकारी दिए ।
त्यस्तै संस्कृति पर्यटन तथा नागरिक उड्डयन मन्त्रालयका सचिव केदार न्यौपानेले नेपाल एयरलाइन्सका ४ र हिमालयन एयरलाइन्सका ४ वटा विमान तयारी अवस्थामा रहेका भन्दै आवश्यक परे अन्य नीजि क्षेत्रका बिमानबाट पनि बिदेशमा रहेका नेपालीलाई उद्धार गरिने बताए ।
समिति सदस्यहरुले बिदेशमा समस्यामा रहेका नेपाल ल्याएपछि सुरक्षित स्थानमा राख्नुपर्ने बताएका थिए । उनीहरुले चौरमा क्वारेन्टाइन बनाउन नहुने सुझाव दिएका थिए ।
बैठकमा परराष्ट्र मन्त्रालयका सचिव शंकरदास बैरागीले केहिदिनभित्रै खाडी मुलुकबाट आउने श्रमिहरुको आधिकारिक तथ्याङ्क आउने जानकारी दिए । अन्य देशको तथ्याङ् आउन भने केही दिन लाग्ने उनले बताए ।
