आफ्नो कुरा मात्र सुनाउनु हुन्छ भने राष्ट्रिय एकताको कल्पना नगर्नुस्ः महन्थ ठाकुर
काठमाडौं । जनता समाजवादी पार्टीका नेता महन्थ ठाकुरले देशको एक भागको जनसंख्या संविधानप्रति असन्तुष्ट रहेको बेला राष्ट्रिय एकताको कुरा गर्न नसकिने बताएका छन् । संविधान संशोधन विधेयक संसद सचिवालयले दर्ता नगरेपछि ठाकुरले संविधान संशोधन गर्नुपर्ने मागहरु उठाउँदै आएका जनताका कुरा नसुने राष्ट्रिय एकताको कुरा सम्भव नभएको बताएका हुन् ।
शुक्रबार विधेयक दर्ता गर्न संसद सचिवालय पुगेका ठाकुर लगायतका नेताहरु संसद सचिवालयले दर्ता नगरेपछि त्यसै फर्किएका थिए । उनले भने, ‘देशको एक भागका जनताका आक्रोशित भएका बेला त्यसलाई सुन्नुहुन्न र आफ्नो कुरा मात्र सुनाउनु हुन्छ भने राष्ट्रिय एकताको कल्पना नगर्नुस्, विवाद अरु ठाउँमा पनि छ, त्यो कुरा उठ्छ, छोडदैनौं हामीले ।’ एकता हुनुअघिको राष्ट्रिय जनता पार्टीले नागरिकता, भाषा, समानुपातिक प्रतिनिधित्व लगायतका विषयहरुमा संविधान संशोधनको माग गर्दै आएको छ ।