कम्युनिस्ट पार्टीभित्र संघर्ष भइरहन्छः प्रचण्ड
काठमाडौँ । सत्तारुढ नेकपाका अध्यक्ष पुष्पकमल दाहाल प्रचण्डले विवाद रहित कुनै पार्टी नै नहुने बताएका छन् । पार्टीको वागमती प्रदेश कमिटीको राजनीतिक प्रशिक्षण तथा भेलालाई सम्बोधन गर्दै अध्यक्ष प्रचण्डले विवाद रहित भएको दिनदेखि पार्टी नै नचाहिने बताएका हुन् ।
उनले कम्युनिस्ट जमेको पोखरीको पानी जस्तो नभएको बताए । उनले भने ‘द्वन्द्वात्मक भौतिकवादी हुन्छ, यो गडगडाउने खोला जस्तो हो। यो शान्त भइदिए हुन्थ्यो, शिष्ट भइदिए हुन्थ्यो, एकमुख भएर हिँडिदिए हुन्थ्यो भन्ने लाग्न सक्छ। तर, साँच्चै विवाद रहीत भएको दिनदेखि पार्टी नै चाहिँदैन।’
प्रचण्डले कम्युनिस्ट आन्दोलन साम्यवादमा नपुग्दासम्म पार्टीभित्र विवाद, संघर्ष, भूमरी परिराख्ने, ठक्कर खाने भइराख्ने बताए । उनले त्यो परिस्थितिलाई पार्टीका नेताहरूले स्वीकार्नुपर्ने बताए । उनले अब एकले अर्कालाई आशंका गर्नुपर्ने आवश्यकता नरहेको भन्दै यसलाई थप विकसित गरेर जानुपर्ने बताए । उनले अब आफू मात्रै ठीक, अरु सबै बेठीक भन्ने गलत मानसिकता त्याग्नुपर्ने बताए ।