बेलायतका लागि नेपाली पूर्वराजदूत शर्माको हृदयघातबाट निधन
काठमाडौं । बेलायतका लागि नेपालका पूर्वराजदूत मुरारीराज शर्माको हृदयघातका कारण लन्डनमा निधन भएको छ । लन्डन पट्नी निवासी ६८ वर्षीय शर्माको मंगलबार बिहान पौने ११ बजेतिर घरमै निधन भएको शर्माका आफन्तले जानकारी दिएका छन् ।
मर्निङ वाक गरी घर फर्किएर ब्रेकफास्ट खाएको केही समयपछि उनको निधन भएको थियो । शर्माको शव अहिले लन्डन टुटिङस्थित सेन्ट जोर्ज अस्पतालमा राखिएको छ । छोराहरु अमेरिकाबाट आएपछि अन्त्येष्टि कहाँ गर्ने भन्नेबारे टुंगो बताइएको छ ।
शर्मा श्रीमती निलाका साथ लन्डनमा बस्थे । उनका दुई छोरा अमेरिकामा चिकित्सक छन् । उनको स्थायी घर भोजपुरको दिङ्ला हो । सन् २००७ नोभेम्बर देखि २००९ अप्रिलसम्म शर्मा बेलायतका लागि नेपाली राजदूत भएर काम गरेका थिए ।