नागरिकता बिधेयक प्रतिनिधिसभामा पेश
काठमाडौं । राज्य व्यवस्था समितिले नेपाल नागरिकता ऐन संशोधन विधेयक सम्बन्धी समितिको प्रतिवेदन प्रतिनिधिसभामा पेश गरेको छ ।
प्रतिनिधिसभाको मंगलबारको बैठकमा राज्य व्यवस्था तथा सुशासन समितिका सभापति शशि श्रेष्ठले नेपाल नागरिकता (पहिलो संशोधन) विधेयक सम्बन्धी समितिको प्रतिवेदन पेश गरेकी हुन् ।
प्रतिवेदन पेश गर्दै समिति सभापति श्रेष्ठले लामो समय सहमतिका लागि कुर्दा बिधेयक पेश गर्न ढिलाई भएको बताइन् । उनले विधेयकमा रहेका अधिकांश विषयमा सर्वसम्मति जुटेको र अन्तिम समय सम्मको अधिकतम प्रयासबाट पनि सहमति जुट्न नसकेका विषयलाई बहुमतका आधारमा पारित गरिएको बताइन् । २०७५ साल भदौमा प्रतिनिधिसभाले नेपाल नागरिकता ऐन २०६३ लाई संशोधन गर्न बनेको विधेयकमाथि प्राप्त संशोधन सहित दफाबार छलफलका लागि सम्बन्धीत समितिमा पठाउने निर्णय गरेको थियो ।